По возгласе священника: Благослове́н Бог наш всегда, ны́не и при́сно и во ве́ки веко́в.
Ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше И́стины, и́же везде́ Сый, и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды).
Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь.
Пресвята́я Тро́ице, поми́луй нас, Го́споди, очи́сти грехи́ на́ша: Влады́ко, прости́ беззако́ния на́ша, Святы́й, посети́ и исцели́ не́мощи на́ша, И́мене Твоего́ ра́ди.
Го́споди, поми́луй. (Трижды)
Сла́ва, и ны́не:
О́тче наш, И́же еси́ на небесе́х, да святи́тся Имя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Священник: Я́ко Твое́ есть Ца́рство Отца́ и Си́ла, и Сла́ва, и Сы́на и Свята́го Ду́ха, ны́не и при́сно и во ве́ки веко́в.
Ами́нь.
Таже, Го́споди поми́луй. (12 раз)
Сла́ва, и ны́не:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 142.
Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́: душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой: не отврати́ лица́ Твоего́ от мене́, и уподо́блюся низходя́щим в ров. Слы́шану сотвори́ мне зау́тра ми́лость Твою́, я́ко на Тя упова́х: скажи́ мне, Го́споди, путь, в о́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющия души́ мое́й, я́ко аз раб Твой есмь.
Сла́ва, и ны́не:
Аллилу́иа, аллилу́иа, аллилу́иа, сла́ва Тебе́, Бо́же. (Трижды)
Таже иерей, или диакон, глаголет великую ектению:
Ми́ром Го́споду помо́лимся.
Лик: Го́споди, поми́луй.
О Свы́шнем ми́ре и спасе́нии душ на́ших Го́споду помо́лимся.
Лик: Го́споди, поми́луй.
О ми́ре всего́ ми́ра, благостоя́нии святы́х Бо́жиих церкве́й и соедине́нии всех, Го́споду помо́лимся.
Лик: Го́споди, поми́луй.
О святе́м хра́ме сем, и с ве́рою, благогове́нием и стра́хом Бо́жиим входя́щих вонь, Го́споду помо́лимся.
Лик: Го́споди, поми́луй.
О Вели́ком Господи́не и отце́ на́шем Святе́йшем Патриа́рхе Кири́лле, и о Господи́не на́шем Высокопреосвяще́ннейшем митрополи́те Ювена́лии, честне́м пресви́терстве, во Христе́ диа́констве, о всем при́чте и лю́дех Го́споду помо́лимся.
Лик: Го́споди, поми́луй.
О Богохрани́мей стране́ на́шей, власте́х и во́инстве ея́, Го́споду помо́лимся.
Лик: Го́споди, поми́луй.
О святе́й оби́тели сей, вся́ком гра́де, стране́, и ве́рою живу́щих в них, Го́споду помо́лимся.
Лик: Го́споди, поми́луй.
О благорастворе́нии возду́хов, о изоби́лии плодо́в земны́х, и вре́менех ми́рных, Го́споду помо́лимся.
Лик: Го́споди, поми́луй.
О пла́вающих, путеше́ствующих, неду́гующих, стра́ждущих, плене́нных, и о спасе́нии их, Го́споду помо́лимся.
Лик: Го́споди, поми́луй.
О изба́витися нам от вся́кия ско́рби, гне́ва и ну́жды, Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Возглашение: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху ны́не, и при́сно, и во ве́ки веко́в.
Лик: Ами́нь.
И абие поется во 4 глас тропаря святаго:
Бог Госпо́дь и яви́ся нам, Благослове́н Гряды́й во и́мя Госпо́дне.
Стих 1: Испове́дайтеся Го́сподеви. я́ко Благ, я́ко в век ми́лость Его́.
Стих 2: Обыше́дше обыдо́ша мя, и и́менем Госпо́дним противля́хся им.
Стих 3: Не умру́, но жив бу́ду, и пове́м дела́ Госпо́дня.
Стих: 4: Ка́мень, его́же небрего́ша зи́ждущии, сей бысть во главу́ у́гла: от Го́спода бысть сей, и есть ди́вен во очесе́х на́ших.
Таже глаголем тропарь, глас 4:
Возне́слся еси́ смире́нием свои́м над ми́ром, о́тче Преподо́бне,/ доброде́тельми победи́в злоко́зненнаго врага́,/ чистото́ю жития́ просия́в, я́ко со́лнце второ́е,/ мно́гия лю́ди ко спасе́нию приводя́./ Те́мже моли́ Христа́ Бо́га, Преподо́бне о́тче наш Дави́де,/ дарова́ти нам мир и ве́лию ми́лость,// и спасе́ние душа́м на́шим.
Сла́ва, и ны́не:
Е́же от ве́ка утае́нное/ и А́нгелом не све́домое та́инство,/ Тобо́ю, Богоро́дице, су́щим на земли́ яви́ся Бог,/ в несли́тном соедине́нии воплоща́емь,/ и, Крест во́лею нас ра́ди восприи́м,/ и́мже воскреси́в первозда́ннаго,// спасе́ от сме́рти ду́ши на́ша.
Песнь 1
Ирмос: Пои́м лю́дие ди́вно чудоде́йствовавшему/ в чермне́м мо́ри, Христу́ Бо́гу:/ я́ко дре́вле Изра́иля всевооруже́на,/ стопа́ми пешеше́ствовати непроходи́мую сотвори́,// и зло́бы делода́теля фарао́на во глубине́ потопи́.
Преподо́бне о́тче наш Дави́де, моли́ Бо́га о нас.
Даждь ми, Христе́, мой Спа́се, проще́ние мно́гих мои́х согреше́ний, я́ко да и мы почита́ем па́мять Твоего́ уго́дника, преподо́бнаго Дави́да. Его́же моли́твами, Бо́же, спаси́ нас.
Преподо́бне о́тче наш Дави́де, моли́ Бо́га о нас.
От младе́нства ты, блаже́нне Дави́де, позна́н бысть Бо́гом и, на Него́ наде́яся, преподо́бным Пафну́тием наставля́емь на спаси́тельныя Его́ повеле́ния. Ему́же ны́не предстоя́ со дерзнове́нием, о нас помоли́ся.
Преподо́бне о́тче наш Дави́де, моли́ Бо́га о нас.
Священноукра́сил еси́ себе́, о́тче, ра́зумом и де́тельным виде́нием благода́ти, Богоглаго́ливе Дави́де, жела́я венца́ сла́вы Христо́вы, и твою́ наде́жду изря́дно, преблаже́нне, не погреши́л еси́.
Преподо́бне о́тче наш Дави́де, моли́ Бо́га о нас.
Тьму и мрак любостра́стнаго ми́ра любо́вию ко Христу́ пыла́ющею непреткнове́нно преше́д и све́тлостию А́нгельскаго о́браза приче́тся, а́ки вне пло́ти был еси, сего́ ра́ди пое́ши Пода́вшему ти си́лу.
Преподо́бне о́тче наш Дави́де, моли́ Бо́га о нас.
О́тче блаже́нне Дави́де, всенра́вно к Бо́гу, ра́дуяся, приступи́л еси́, вне пло́ти и ми́ра быв, и ум нему́тен, утвержде́н воздержа́нием, соблю́л еси́, Боже́ственным безстра́стием отсю́ду присвоя́яся.
Сла́ва: Дово́льно исто́чника пив Ева́нгельскаго вод оби́льных, из чре́ва ны́не ре́ки чуде́с источа́еши, преподо́бне Дави́де, и напая́еши ве́рою к тебе́ притека́ющия.
И ны́не: От скве́рных усте́н хвале́ние приими́, Всенепоро́чная, я́коже пре́жде Сын Твой, Бог же мой и Госпо́дь, прия́т две ле́пте вдови́цы, и разреше́ние прегреше́ний мои́х пода́ждь, я́ко по до́лгу почита́ю Тя.
Песнь 3.
Ирмос: Да не хва́лится мудр хваля́йся,/ но о сем е́же разумева́ти:/ я́ко несть свят, я́ко Бог наш/ вознося́й рог наш,// дая́й кре́пость царе́м на́шим.
Преподо́бне о́тче наш Дави́де, моли́ Бо́га о нас.
Любо́вь немощны́м вы́ну явля́я, о́тче преподо́бне Дави́де, от Бо́га прия́л еси́ благода́ть мно́гу стра́сти цели́ти неисце́льныя.
Преподо́бне о́тче наш Дави́де, моли́ Бо́га о нас.
Живоно́сный Крест на ра́мо взем, преподо́бне, распе́ншемуся на нем Христу́ после́довал еси́, о́тче Дави́де, и вра́жия полки́ прогна́л еси́, и нам проси́ ми́лости, торжеству́ющим твое́ пра́зднство, Богоно́се.
Преподо́бне о́тче наш Дави́де, моли́ Бо́га о нас.
На Го́спода всю, преподо́бне, возложи́в наде́жду, ника́коже поколеба́вшись, е́же отпа́сти от лу́чшаго стоя́ния, но зако́нно соверши́л еси́ Боже́ственное тече́ние ума́ пра́востию.
Преподо́бне о́тче наш Дави́де, моли́ Бо́га о нас.
Умертви́в я́же на земли́ мудрова́ния, преподо́бне Дави́де, умертви́вшемуся Сло́ву тебе́ ра́ди му́жественно после́довал еси́, и к жи́зни неги́бнущей преподо́бно премину́л еси́.
Преподо́бне о́тче наш Дави́де, моли́ Бо́га о нас.
Юдо́ль сия́ гроб твой иму́щая, иде́же лежи́т честно́е те́ло твое́, благово́ние источа́ет, я́коже рай Бо́жий, облагоуха́я ве́рныя и служа́щия в оби́тели твое́й, те́мже, ра́дуяся, пресла́вне, не забу́ди и нас, о́тче Дави́де.
Сла́ва: Предложе́ние твоего́ ума́ бе, а́ки лук напряже́н, о́тче, живы́й бо во юдо́ли сей плаче́вней, восхожде́ние име́л еси́ в се́рдце свое́м вы́ну к Бо́гу: и мне у́бо, жизнь свою́ веду́щу вы́ну в печа́лех, Дави́де, помози́, моля́ся о мне, да возвесели́тся о Го́споде се́рдце мое́.
И ны́не: Отцу́ Собезнача́льнаго Сы́на пло́тию родила́ еси́, Пренепоро́чная Де́во, Его́же моли́ с преподо́бным Дави́дом, да сотвори́т ны сы́ны Своего́ Ца́рствия и насле́дники обетова́ния ве́чнаго.
Моли́ Бога о нас, преподо́бне о́тче наш Дави́де,/ я́ко мы усе́рдно к тебе́ прибега́ем// ско́рому помо́щнику о душа́х на́ших.
Па́ки и па́ки ми́ром Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Пресвяту́ю, Пречи́стую, Преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Возглашение: Я́ко Ты Еси́ Бог Наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Седален, глас 8:
Храни́тель сый Боже́ственных повеле́ний Влады́ки, сла́вне, чи́стое житие́ твое́ показа́ тя священноде́теля Боже́ственна, ка́плями пото́в твои́х пре́лести лю́тое у́глие погаси́л еси́ и в ти́хое приста́нище дости́гл еси, зри́ши, блаже́нне, Его́же возжеле́л еси́. Те́мже вопие́м ти: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.
Сла́ва, и ны́не: Богородичен: Вои́стину Де́ву и Еди́ну в жена́х, Тя без се́мени ро́ждшую Бо́га пло́тию, вси ублажа́ем, ро́ди челове́честии: Огнь бо всели́ся в Тя Божества́ и, я́ко Младе́нца, млеко́м пита́еши Зижди́теля и Го́спода. Тем, А́нгельский и челове́ческий род досто́йно сла́вим пресвято́е Рождество́ Твое́ и согла́сно вопие́м Ти: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.
Песнь 4.
Ирмос: Услы́шах Твое́ Христе́, вои́стинну пресла́вное,/ я́ко безсме́ртен Сый Бог,/ уподо́бися сме́ртным челове́ком,/ и пребы́сть е́же бе:// и того́ ра́ди Твою́ сла́влю си́лу.
Преподо́бне о́тче наш Дави́де, моли́ Бо́га о нас.
А́нгелом Небе́сным был еси́ собесе́дник, о́тче преподо́бне, смире́ние, бде́ние, и спротяже́нную моли́тву, и любо́вь нелицеме́рну, и ве́ру, и наде́жду стяжа́в.
Преподо́бне о́тче наш Дави́де, моли́ Бо́га о нас.
Лик страстоте́рпческий весели́тся и лику́ет святи́телей собо́р и пра́ведных, совсе́льника тя прие́мше, блаже́нне, с ни́миже в невече́рнем све́те лику́еши, венце́м преподо́бия све́тло украша́емь, моли́ о воспева́ющих ве́рою святу́ю па́мять твою́.
Преподо́бне о́тче наш Дави́де, моли́ Бо́га о нас.
Умиле́нием мно́зем и стена́нием се́рдца жития́ по́прище преше́д, му́дре, в страну́ безстра́стия пресели́ себе́, в не́йже свет прие́м в се́рдцы твое́м, непреста́нно весели́шися, неизрече́ннаго Све́та Христа́ наслажда́ешися.
Преподо́бне о́тче наш Дави́де, моли́ Бо́га о нас.
Поче́т до́брыми твои́ми нра́вы Бо́га Преблага́го, Дави́де. Те́мже изцеле́ний исто́чник излива́еши, зной отгоня́я боле́зней же и печа́лей, му́дре.
Преподо́бне о́тче наш Дави́де, моли́ Бо́га о нас.
Ре́ки сле́зными пусты́ни напои́л еси́, блаже́нне, се́мя трудо́в твои́х се́я в них. Те́мже и стори́чный плод ра́достно пожа́л еси́, вопия́: сла́ва си́ле Твое́й, Го́споди.
Сла́ва: Име́я во уме́ свое́м час сме́ртный, и неумы́тное суди́ще, и му́ки гре́шников, вы́ну от о́чию свое́ю сле́зы излива́я и моли́твы возсыла́я к Бо́гу, преподо́бне, да изба́вит ду́ши гре́шных ве́чнаго муче́ния и сподо́бит их Ца́рствия Своего́.
И ны́не: Непло́дствующия мы́сли моея́ непло́дие вся́кое отжени́ и плодоно́сну доброде́тельми ду́шу мою́ покажи́, Всесвята́я Богоро́дице, ве́рных По́моще.
Песнь 5.
Ирмос: Све́те И́стинный/ Просвеща́яй вся́каго челове́ка,/ Возсия́й в нас заре́ю за́поведей Твои́х,/ и отжени́ от нас нощь страсте́й,// я́ко ра́зве Тебе́ ино́го бо́га не ве́мы.
Преподо́бне о́тче наш Дави́де, моли́ Бо́га о нас.
Обле́кся в Христо́во смире́ние и, я́ко а́гня незло́биво, Тому́ принесе́ себе́, тем и зе́млю кро́тких насле́дова, иде́же водворя́яся, сла́виши Го́спода.
Преподо́бне о́тче наш Дави́де, моли́ Бо́га о нас.
Стра́сти попали́л еси́ огнем воздержа́ния, ду́шу озари́в Боже́ственными сия́нии, де́монов прогони́тель яви́лся еси́, Боже́ственным Ду́хом просвеща́емь.
Преподо́бне о́тче наш Дави́де, моли́ Бо́га о нас.
И́же в жи́зни сей упа́сл еси́ благоче́стно, не забу́ди ста́да твоего́, е́же, му́дре, собра́л еси́, и ны́не потщи́ся, о́тче наш Дави́де, да привлече́ши во огра́ду Небе́сную.
Преподо́бне о́тче наш Дави́де, моли́ Бо́га о нас.
Ты процве́л еси́, преподо́бне, в пусты́ни, дави́дски, я́коже фи́никс, сия́я доброде́тельми, отону́дуже и позна́н был еси́ я́ко со мно́гим приходя́щим ревнова́ти твоему́ е́же по Бо́гу житию́.
Преподо́бне о́тче наш Дави́де, моли́ Бо́га о нас.
Позна́в Бо́га, преподо́бне, по вме́стному челове́ком, те́мже и позна́н был еси́ от Бо́га по и́мени про́чих оте́ц и душ па́стырь устро́ен был еси́, сия́ наставля́я к доброде́телем и приводя́ Бо́гу спаса́емы.
Сла́ва: Ра́зныя боле́зни изцеля́я, Бо́га приле́жно моля́, больна́го нога́ма сотвори́л еси́ це́ла и Бо́жиим про́мыслом показа́л еси́ здра́ва. Преподо́бне Дави́де, моли́ся приле́жно о чадоро́дии безча́дных, мо́лим тя, преблаже́нне, приле́жно.
И ны́не: Еди́на Еди́наго от Тро́ицы родила́ еси́ во дву существу́, Ипоста́си же еди́ней Ви́димаго, Де́во. Ему́же песнопое́м: благослове́н еси́, Пра́ведный отце́в Бо́же.
Песнь 6.
Ирмос: Морско́е рыда́ние Христе́ Ио́нино/ Подража́яй зову́ Ти:/ Живо́т мой от а́да прегреше́ний возведи́,/ да во хра́ме сла́вы Твоея́// со гла́сом хвале́ния пожру́ Ти.
Преподо́бне о́тче наш Дави́де, моли́ Бо́га о нас.
Па́стырь сый от Ду́ха Свята́го науче́нный, блаже́нне, наставля́л еси́ ста́до твое́ Небе́сная разумева́ти и страсте́й наше́ствия отгоня́ти, Ца́рствия же Бо́жия и пра́вды Его́ иска́ти.
Преподо́бне о́тче наш Дави́де, моли́ Бо́га о нас.
О́бщник сый ада́мскаго ро́да и порожде́ние, бе́здну греха́ избе́гл еси́, не оскверни́вся ниже́ в ю́ности, Крест бо на ра́мо взем не в мо́ри погря́з, но на го́ру Вознесе́ния возше́л еси́.
Преподо́бне о́тче наш Дави́де, моли́ Бо́га о нас.
Дави́де преподо́бне, ты я́звы Го́спода Иису́са и Крест Его́, я́ко вене́ц злат, с ра́достию прии́м, услы́шал еси́ вожделе́нный глас: до́брый ра́бе, благи́й и ве́рный, вни́ди в ра́дость Го́спода твоего́.
Преподо́бне о́тче наш Дави́де, моли́ Бо́га о нас.
От ю́ности, блаже́нне, име́л еси́ житие́ свое́ чи́сто и, того́ ра́ди, Пречи́стому Влады́це прилепи́ся, предстои́ши ны́не со а́нгельскими ли́ки при́сно источа́еши пресла́вная чудеса́ и изцеле́ния с ве́рою приходя́щим к тебе́.
Преподо́бне о́тче наш Дави́де, моли́ Бо́га о нас.
Благода́ть твоя́, преподо́бне Дави́де, озаря́ет ве́рныя, излия́нием чуде́с от Бо́га обогати́лся еси́, о́тче, те́мже приходя́щих облегча́еши боле́зни. Утверди́ у́бо и на́ша мы́сли приноси́ти Христу́ же́ртву хвале́ния.
Сла́ва: Нощь, я́ко день, и день, я́ко нощь, тебе́ вменя́шеся, Дави́де о́тче наш: не дал бо еси́, по проро́ку, сна очи́ма твои́ма, не ве́ждома твои́ма дрема́ния, ниже́ поко́я телеси́ твоему́, до́ндеже сие́ чи́сто с душе́ю Бо́гу предста́вил еси́.
И ны́не: Отрокови́ца Неискусому́жная ражда́ет Творца́ всех и Го́спода, и к Рожде́нному мо́лится о душа́х на́ших, му́дре пасо́мых па́стырем, и по исхо́де свое́м вы́ну с на́ми в неистле́нии свята́го телесе́ своего́ пребыва́ющим.
Па́ки и па́ки ми́ром Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас Бо́же, Твое́ю благода́тию.
Лик: Го́споди, поми́луй.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.
Лик: Тебе́ Го́споди.
Возглашение: Ты бо Еси́ Царь ми́ра, и Спас душ на́ших и Тебе́ сла́ву возсыла́ем Отцу́ и Сы́ну и Свято́му Ду́ху ны́не и при́сно и во ве́ки веко́в.
Лик: Ами́нь.
Кондак 1
Избра́нному в пропове́дника житие́м свои́м зако́на Христо́ва, Преподо́бне о́тче наш Дави́де, похва́льная пе́ния прино́сим ти, преблаже́нне; Ты же, я́ко име́яй дерзнове́ние ко Го́споду, Его́ же в се́рдце твое́м всегда́ име́л еси́, моли́ спасти́ся нам ча́дам твои́м, любо́вию ти зову́щим: Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Икос 1
А́нгельское житие́ возлюби́в, Преподо́бне, во оби́тель Пафну́тия Бо́ровскаго прите́кл еси́ и та́мо о́браз и́ноческий от руки́ его́ прия́ти сподо́бился еси́, послуша́ние ди́вное явля́я. Сие́ помина́юще, со умиле́нием воспева́ем ти си́це:
Ра́дуйся, равноа́нгельное житие́ возлюби́вый;
Ра́дуйся, собла́зны ми́ра сего́ му́жественно презре́вый;
Ра́дуйся, во оби́тель Пафну́тия Бо́ровскаго притеки́й;
Ра́дуйся, послуша́ние ди́вное яви́вый.
Ра́дуйся, я́ко послуша́ние твое́ удиви́ а́нгелов и челове́ков;
Ра́дуйся, им же посрами́ прего́рдаго врага́.
Ра́дуйся, о́браз и́ноческий от руки́ отца́ твоего́ духо́внаго прие́мый;
Ра́дуйся, стро́гое подви́жническое житие́ избра́вый.
Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Кондак 2
Ви́дяще духо́вный оте́ц твой преподо́бный Пафну́тий ди́вное по Бо́зе житие́ твое́, Преподо́бне о́тче Дави́де, на служе́ние Бо́гу и лю́дям отпра́ви тя, возглаша́я песнь хвале́бную: Аллилу́ия.
Икос 2
Разуме́л еси́ Преподо́бне о́тче Дави́де, я́ко вся кра́сная ми́ра сего́ су́етна и скоромимоходя́ща, в пусты́нное ме́сто прише́л еси́ и оби́тель Вознесе́нию Госпо́дню устро́ил еси́. Сие́ воспомина́я, ублажа́ем тя похвалы́ таковы́ми:
Ра́дуйся, оби́тель Бо́ровскую послуша́ния ра́ди оста́вивый;
Ра́дуйся, я́ко свою́ оби́тель устро́ити благослове́ние получи́л еси́.
Ра́дуйся, в пусты́нное ме́сто прише́дый;
Ра́дуйся, слеза́ми теплы́ми о́ное напои́вый.
Ра́дуйся, це́рковь и оби́тель Вознесе́ния Госпо́дня устро́ивый;
Ра́дуйся, в ню́же ове́ц слове́сных ста́до собра́вый.
Ра́дуйся, я́ко ста́ду тобо́ю со́бранному оте́ц и наста́вник был еси́;
Ра́дуйся, я́ко смиренному́дрием тех исправля́л еси́.
Ра́дуйся, Преподо́бне о́тче наш Да́виде, те́плый хода́таю спасе́ния на́шего.
Кондак 3
Си́лою Вы́шняго укрепля́емь, Преподо́бне Дави́де, пусты́нное озлобле́ние и в потре́бных ску́дость име́я, благода́рно терпе́л еси́, в душе́ свое́й Христа́ приобрета́я, воспева́я Ему́: Аллилу́ия.
Икос 3
Иму́ще ико́ну Зна́мения Богома́тери, я́ко зало́г спасе́ния, укрепля́лся еси́, Преподо́бне, моли́твою к Преблагослове́нней Де́ве, науча́я бра́тию доброде́тельному житию́. Моли́ся у́бо о нас, покрови́телю наш, да, ревну́я подвиго́м твои́м, спасе́м ду́ши на́ша и тебе́ воззове́м:
Ра́дуйся, благоволе́нием Богома́тери осене́нный;
Ра́дуйся, я́ко с ико́ною Зна́мения Богома́тери в пу́стынь твою́ прише́л еси́.
Ра́дуйся, я́ко оби́тели твое́й чрез о́браз Пречи́стыя благослове́ние стяжа́л еси́;
Ра́дуйся, Засту́пницы Усе́рдныя благогове́йный почита́телю.
Ра́дуйся, моли́тве ко Го́споду и Пренепоро́чней Его́ Ма́тери бра́тию твою́ науча́л еси́;
Ра́дуйся, не забыва́яй и нас заблу́дших, призыва́ющих тя.
Ра́дуйся, наста́вниче спасе́нию;
Ра́дуйся, гре́шных приводя́й ко испра́влению.
Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Кондак 4
Бу́рею недоуме́ния смуще́ни есмы́, ка́ко бо возмо́жем исчи́слити по́двиги твоя́, Блаже́нне Дави́де, бде́ние и сухояде́ние, непреста́нныя моли́твы и про́чия доброде́тели? Их же на ся подъя́л еси́, воспева́я немо́лчно песнь побе́дную: Аллилу́ия.
Икос 4
Слы́шавше бли́жнии и да́льнии ангелоподо́бное житие́ твое́, Преподо́бне о́тче наш Дави́де, и я́ко моли́твою твое́ю мно́зи, с ве́рою притека́ющии к ра́це моще́й твои́х, от разнообра́зных неду́гов изцеле́ния прие́млют; благода́рне воспомина́юще о толи́ких твои́х благодея́ниих, ра́достно взыва́ем к тебе́ такова́я:
Ра́дуйся, неду́гующих врачу́;
Ра́дуйся, ско́рбным сострада́телю.
Ра́дуйся, душе́вных и теле́сных не́мощей ско́рый цели́телю;
Ра́дуйся, прося́щим ми́лости пода́телю.
Ра́дуйся, я́ко под сень пу́стыни твоея́ хотя́щих спасе́ния приима́л еси́;
Ра́дуйся, я́ко о тех моли́твенник тепл в жи́зни твое́й был еси́.
Ра́дуйся, и нас моли́твами твои́ми укрепля́ющий;
Ра́дуйся, вели́кий Бо́гу уго́дниче.
Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Кондак 5
Боготе́чная звезда́ яви́лся еси́, Преподо́бне, не́бо церко́вное украша́я и пла́вающия во мра́ке жите́йских попече́ний к ти́хому приста́нищу и́ночества наставля́я, да вопию́т вси Бо́гу: Аллилу́ия.
Икос 5
Ви́дим тя, Преподо́бне о́тче Дави́де, дости́гшаго в му́жа соверше́нна о Христе́ и преиспо́лненнаго дарова́ний Боже́ственных, в Ева́нгелии Христо́ве обетова́нных ве́рным после́дователем Вопло́щшагося Бо́га Сло́ва. Тем же твои́м подвиго́м чудя́щеся, вопие́м ти хвале́бно:
Ра́дуйся, Ева́нгелия Христо́ва немо́лчный пропове́дниче;
Ра́дуйся, Апо́стольских преда́ний ре́вностный храни́телю.
Ра́дуйся, на скрижа́лех се́рдца твоего́ Зако́н Христо́в написа́вый;
Ра́дуйся, от глубины́ серде́чныя до́брая и душеспаси́тельная наставле́ния челове́ком износи́вый.
Ра́дуйся, да́ром чудотворе́ния облагода́тствованный;
Ра́дуйся, буду́щая, я́ко настоя́щая прови́девый.
Ра́дуйся, в собесе́дование с Бо́гом вы́ну углубле́нный;
Ра́дуйся, благода́тию Бо́жиею преобогаще́нный.
Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Кондак 6
Пропове́дник смире́ния и́стиннаго яви́лся еси́, о́тче, и ча́да твоя́ духо́вная ве́рно руководи́л еси́ к Сио́ну Небе́сному, иде́же есть жили́ще всех спасе́нных милосе́рдием Христа́ Бо́га, Его́ же возлю́биша се́рдцем чи́стым и навыко́ша пе́ти Ему́: Аллилу́ия.
Икос 6
Возсия́ нам, я́ко звезда́ путево́дная, возде́ржное по́стническое житие́ твое́, о́тче Преподо́бне: не скорбе́л еси́ о бра́шнех, е́же не поста́вит нас пред Бо́гом; не раде́л еси́ о добро́те ри́зней, доброде́тельми ду́шу твою́ украша́ти предпочита́я. Сего́ ра́ди нетле́нием и чудесы́ просла́влен еси́ от Подвигополо́жника Христа́, от нас же прие́млеши пе́сенные сия́ похвалы́:
Ра́дуйся, воздержа́ние в пи́щи и питии́ пра́вило изве́стное;
Ра́дуйся, нетре́звеннаго пития́ во оби́тели твое́й име́ти возбрани́вый.
Ра́дуйся, Боговеща́нный учи́телю благоче́стия и чистоты́;
Ра́дуйся, чесому́ учи́л еси́, та и сам еси́ твори́л неле́ностно.
Ра́дуйся, немощны́х да́нною ти от Го́спода благода́тию укрепи́вый;
Ра́дуйся, скорбя́щих сла́достию твои́х слове́с уте́шивый.
Ра́дуйся, ча́дам Це́ркви лучеза́рный свети́льниче;
Ра́дуйся, ди́вный Христо́в уго́дниче.
Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Кондак 7
Хотя́ избра́н дом Ду́ху Свято́му себе́ сотвори́ти, потща́лся еси́ те́сным и приско́рбным путе́м, в жизнь ве́чную веду́щим, взем на ра́мо свое́ Крест Христо́в, ше́ствовати, и дости́гл еси́ воздая́ния в небе́сном всевесе́лом пребыва́нии тебе́ угото́ванного, поя́ благода́рственно Бо́гу: Аллилу́ия.
Икос 7
Но́вым подвиго́м духо́вным вдал еси́ себе́, досточу́дне о́тче, в пу́стыни уедине́нно пребыва́я в моли́твах, в поще́ниих и труде́х непреста́нных, е́же ви́дя Всеви́дец Госпо́дь, собра́ к тебе́ и́ноков пустыннолюби́вых, и́же хотя́ху с тобо́ю жи́ти, и во спасе́ние назида́тися: и та́ко оби́тель святу́ю устро́ил еси́, я́ко крин в пусты́ни процве́тшую духо́вно, иде́же до днесь прославля́ется и́мя твое́ си́ми достодо́лжными похвалы́:
Ра́дуйся, кри́не пусты́ннаго прозябе́ния;
Ра́дуйся, ми́ро Христо́ва благоуха́ния.
Ра́дуйся, я́ко пусты́ню духо́вно уплодоноси́л еси́;
Ра́дуйся, пусты́ню непроходи́мую в вертогра́д духо́вный труда́ми твои́ми претвори́вый.
Ра́дуйся, несомне́нною наде́ждою на Бо́га оби́тель твою́ созида́вый;
Ра́дуйся, оби́тель твою́ пусты́нную по преда́нию святы́х и Богоно́сных оте́ц устро́ивый.
Ра́дуйся, строи́телю Богому́дрый общежи́тия и́ноческаго;
Ра́дуйся, оте́ц чадолюби́вый всех притека́ющих к тебе́.
Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Кондак 8
Стра́нника и прише́льца себе́ на земли́ бы́ти помышля́я, час кончи́ны твоея́ пред очи́ма твои́ма при́сно име́л еси́, о́тче Дави́де, и сего́ ра́ди оби́тель и́ноком возгради́л еси́, иде́же моли́твы твоя́ Го́сподеви возсыла́л еси́, поя́ Ему́: Аллилу́ия.
Икос 8
Весь был еси́ любве́ Боже́ственныя испо́лнен, о всеблаже́нне, ника́коже отступа́я к любле́нию пло́ти и ми́ра, но, я́ко безпло́тен, целому́дренно и преподо́бно жизнь твою́ соверши́л еси́. Те́мже и благода́ть прия́л еси́ от Бо́га твори́ти пресла́вная чудеса́. Приими́ у́бо от нас, чудотво́рче святы́й, сия́ усе́рдныя славохвале́ния:
Ра́дуйся, и́стинный подража́телю Христо́ва смире́ния;
Ра́дуйся, сим дости́гнувый ве́чнаго упокое́ния.
Ра́дуйся, мона́шествующим ко спасе́нию наста́вниче;
Ра́дуйся, лико́м преподо́бных соприча́стниче.
Ра́дуйся, пусты́нная озлобле́ния благоду́шно претерпе́вый;
Ра́дуйся, из пу́стыни в ра́йския оби́тели возлете́вый.
Ра́дуйся, в непреста́нных моли́твах бо́дрствовавый;
Ра́дуйся, ум горе́ к Бо́гу вознесе́н всегда́ име́вый.
Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Кондак 9
Вся́кия беды́, ско́рби и напа́сти избавля́я нас, свя́те Дави́де, твои́ми к Бо́гу те́плыми моли́твами, потщи́ся и ны́не дарова́ти нам вре́менная блага́я и ве́чная: да с тобо́ю ку́пно в селе́ниих пра́ведных воспое́м Бо́гу: Аллилу́ия.
Икос 9
Вити́й челове́ческих уста́ не возмо́гут изрещи́ преди́внаго явле́ния твоего́ челове́ку не́коему, разслабле́нием седмь лет стра́ждущу, егда́ же в пу́стынь твою́ идти́ повеле́л еси́ ему́, жезло́м игу́менским ног больны́х косну́вшися. Он же, от неду́га своего́ избавле́ние получи́в, а́бие воспе́ша тебе́:
Ра́дуйся, в со́ниих и виде́ниих земноро́дных зра́ком лица́ твоего́ просвеща́яй;
Ра́дуйся, я́ко от одра́ разсла́бленныя воздвиза́еши.
Ра́дуйся, теле́с на́ших благосострада́тельный врачу́ и хране́ние;
Ра́дуйся, и душ на́ших к Ца́рствию Небе́сному возведе́ние.
Ра́дуйся, я́ко жезл твой игу́менский прикоснове́нием еди́ным изцеля́ет;
Ра́дуйся, жезло́м о́ным разсла́бленнаго нога́ми к хожде́нию воздви́гнувый.
Ра́дуйся, тру́дными ро́дами жене́ стра́ждущей безболе́зненное разреше́ние от бре́мене дарова́л еси́;
Ра́дуйся, о́тче взыска́вый спасе́ния мно́гих.
Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Кондак 10
Спасти́ся всем хотя́й Преблаги́й Госпо́дь яви́ тя, Преподо́бне о́тче Дави́де, о́браз жития́ пра́веднаго: кто бо не умили́тся ви́дя твое́ безме́рное ко всем благосе́рдие; тем же ве́лию к нам ми́лость Бо́жию сла́вяще, вопие́м: Аллилу́ия.
Икос 10
Стена́ тве́рдая яви́лся еси́ всем челове́ком, к заступле́нию твоему́ прибега́ющим, Преподо́бне о́тче наш Дави́де; тем же и нас, к тебе́ притека́ющих и твоея́ святы́я по́мощи прося́щих, от вся́ких бед и напа́стей заступа́й и огражда́й, за е́же мы вопие́м к тебе́ такова́я:
Ра́дуйся, от го́рних высо́т к и́щущим заступле́ния твоего́ ми́лостивно презира́яй;
Ра́дуйся, ми́лость твою́ боля́щим челове́ком явля́яй.
Ра́дуйся, моли́твенно призыва́ющим свято́е и́мя твое́ на по́мощь ускоря́яй;
Ра́дуйся, лю́бящим тя и честву́ющим па́мять твою́ предста́тельством небе́сным воздава́яй.
Ра́дуйся, телеса́ на́ша безме́здно врачу́яй;
Ра́дуйся, о душа́х на́ших Го́спода умоля́яй.
Ра́дуйся, искуша́емым ско́рый о Го́споде покро́в и заступле́ние.
Ра́дуйся, уныва́ющим ободре́ние и скорбя́щим ра́досте.
Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Кондак 11
Пе́ние моле́бное прино́сится ве́рными у ра́ки святы́х моще́й твои́х, Дави́де Богоно́се, ти́и бо лучи́ мно́гих чуде́с испуща́ют, озаря́юще ду́ши и сердца́ и́щущих с ве́рою твоего́ заступле́ния и Бо́гу вопию́щих: Аллилу́ия.
Икос 11
Светоприе́мную свещу́ зрим тебе́, о́тче Преподо́бне, сия́ющу луча́ми Бо́жия благода́ти, а́ще и кре́пость твоя́ оскуде́ и исчеза́ше свет вре́менныя жи́зни сия́. Мы же ве́дуще, я́ко и по сме́рти при́сно мо́лишися о нас, с любо́вию, а́ще ча́да твоя́ есмы́, вопие́м:
Ра́дуйся, до конца́ жи́зни своея́ наставля́яй соблюда́ти Боже́ственныя за́поведи;
Ра́дуйся, до после́дняго часа́ сме́ртнаго попече́ния о не́мощных, ни́щих и стра́нных име́вый.
Ра́дуйся, я́ко и по сконча́нии свое́м обеща́лся еси́ никогда́же отлуче́н бы́ти от оби́тели своея́;
Ра́дуйся, обеща́вый я́ко не оскуде́ет оби́тель твоя́.
Ра́дуйся, я́ко вои́стинну честна́ смерть твоя́, Преподо́бне;
Ра́дуйся, я́ко и по сме́рти с на́ми пребыва́еши.
Ра́дуйся, недре́млющий блюсти́телю мона́хов и по́стников украше́ние;
Ра́дуйся, святы́я оби́тели твоея́ неусы́пный храни́телю.
Ра́дуйся, Преподо́бне о́тче наш Дави́де, те́плый Хода́таю спасе́ния на́шего.
Кондак 12
Благода́ть живу́щую в нетле́нных моща́х твои́х позна́вше, вси лю́дие с любо́вию прихожда́ху к ра́це твое́й и, ра́достно лобыза́юще ю, сла́вляху о тебе́ Бо́га, со умиле́нием вопию́ще Ему́: Аллилу́ия.
Икос 12
Пою́ще Бо́га, Ди́внаго во святы́х Свои́х, восхваля́ем тя, Дави́де преблаже́нне, я́ко дру́га Христо́ва, блаже́нство ра́йское неукло́нным за́поведей Госпо́дних творе́нием стяжа́вшаго. Моли́ о нас, ча́дех твои́х, да и мы с тобо́ю во оби́телех Го́рних водвори́мся, умиле́нно зову́ще ти:
Ра́дуйся, за ангелоподо́бную чистоту́ се́рдца твоего́ Бо́га узре́вый;
Ра́дуйся, я́ко ви́дения пренебе́снаго све́та сподо́бился еси́.
Ра́дуйся, со Христо́м, Его́же возлюби́л еси́, на ве́ки соедини́выйся;
Ра́дуйся, Ца́рствия Небе́снаго и сла́вы ве́чныя насле́дниче.
Ра́дуйся, во благоуха́нии святы́ни моща́ми твои́ми во оби́тели тобо́ю со́зданней почива́еши;
Ра́дуйся, я́ко душе́ю твое́ю чи́стою в Небесе́х Бо́гу предстои́ши, нетле́нными же моща́ми твои́ми ду́ши ве́рных врачу́еши на земли́.
Ра́дуйся, я́ко па́мять твоя́ с похвала́ми почита́ется во Святе́й Це́ркви;
Ра́дуйся, о нас с моли́твою вы́ну Бо́гу предстоя́й.
Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Кондак 13
О, пресла́вный чудотво́рче и вели́кий Христо́в уго́дниче, Дави́де прехва́льне! Ны́нешнее на́ше хвале́бное пе́ние прие́мше, не оста́ви нас, чад твои́х, любо́вию тя почита́ющих, умоли́ Го́спода Сил изба́витися нам в житии́ сем сете́й вра́жиих и в бу́дущем возду́шных мыта́рств и гее́нны избе́гнути, и в Го́рний Иерусали́м всели́тися, иде́же непреста́нно воспева́ти с тобо́ю Бо́гу Серафи́мскую песнь: Аллилу́ия, аллилу́ия, аллилу́ия. (Сей кондак читай трижды)
Икос 1
А́нгельское житие́ возлюби́в, Преподо́бне, во оби́тель Пафну́тия Бо́ровскаго прите́кл еси́ и та́мо о́браз и́ноческий от руки́ его́ прия́ти сподо́бился еси́, послуша́ние ди́вное явля́я. Сие́ помина́юще, со умиле́нием воспева́ем ти си́це:
Ра́дуйся, равноа́нгельное житие́ возлюби́вый;
Ра́дуйся, собла́зны ми́ра сего́ му́жественно презре́вый;
Ра́дуйся, во оби́тель Пафну́тия Бо́ровскаго притеки́й;
Ра́дуйся, послуша́ние ди́вное яви́вый.
Ра́дуйся, я́ко послуша́ние твое́ удиви́ а́нгелов и челове́ков;
Ра́дуйся, им же посрами́ прего́рдаго врага́.
Ра́дуйся, о́браз и́ноческий от руки́ отца́ твоего́ духо́внаго прие́мый;
Ра́дуйся, стро́гое подви́жническое житие́ избра́вый.
Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Кондак 1
Избра́нному в пропове́дника житие́м свои́м зако́на Христо́ва, Преподо́бне о́тче наш Дави́де, похва́льная пе́ния прино́сим ти, преблаже́нне; Ты же, я́ко име́яй дерзнове́ние ко Го́споду, Его́ же в се́рдце твое́м всегда́ име́л еси́, моли́ спасти́ся нам ча́дам твои́м, любо́вию ти зову́щим: Ра́дуйся, Преподо́бне о́тче наш Дави́де, те́плый хода́таю спасе́ния на́шего.
Во́нмем. Прему́дрость. Во́нмем.
Проки́мен. Глас 7.
Честна́ пред Го́сподем / смерть преподо́бных Его́.
Лик: Честна́ пред Го́сподем / смерть преподо́бных Его́.
Стих: Что воздам Го́сподеви о всех я́же воздаде́ ми?
Лик: Честна́ пред Го́сподем / смерть преподо́бных Его́.
Честна́ пред Го́сподем. /
Лик: смерть преподо́бных Его́.
И о сподо́битися нам слы́шанию Свята́го Ева́нгелиа Го́спода Бо́га мо́лим.
Лик: Го́споди, поми́луй. (Трижды)
Прему́дрость, про́сти, услы́шим Свята́го Ева́нгелиа.
Мир всем.
Лик: И ду́хови твоему́.
От Матфе́я Свята́го Ева́нгелия чте́ние.
Лик: Сла́ва Тебе́, Го́споди, сла́ва Тебе́.
Рече́ Госпо́дь свои́м ученико́м: вся Мне предана́ суть Отце́м Мои́м, и никто́же зна́ет Сы́на, то́кмо Оте́ц: ни Отца́ кто зна́ет, то́кмо Сын, и ему́же а́ще во́лит Сын откры́ти. Прииди́те ко Мне вси тружда́ющиися и обремене́ннии, и Аз упоко́ю вы. Возъми́те и́го Мое́ на себе́, и научи́теся от Мене́, я́ко кро́ток Есмь и смире́н се́рдцем, и обря́щете поко́й душа́м ва́шим. И́го бо Мое́ бла́го, и бре́мя Мое́ легко́ есть.
Лик: Сла́ва Тебе́, Го́споди, сла́ва Тебе́.
Кондак. Глас 4:
Ми́ра мяте́ж и сла́ву вре́менную оста́вил еси́, преподо́бне,/ во оби́тель Пафну́тия Бо́ровскаго восте́кл еси́,/ и мона́хов лико́м сопричта́лся еси́,/ и Ио́сифу Во́лоцкому собесе́дник был еси́./ С ни́миже моли́ Всеми́лостиваго Спа́са, о́тче наш Дави́де,/ Пода́ти мир ми́рови// и спасти́ся душа́м на́шим моли́твами твои́ми, преподо́бне.
Икос:
Уясни́ ми язы́к и укрепи́ ми ум, Всеми́лосиве Спа́се, моли́твами Пречи́стыя Твоея́ Ма́тере. Язы́к ми благ глаго́лати пода́ждь на похвалу́ и на умоле́ние Твоего́ уго́дника. Свещу́ души́ моея́ уны́лую, ю́же, воздрема́вся, угаси́х, моли́твами преподо́бнаго Дави́да возжжи́ и не отлучи́ мене́, Христе́, многогре́шша, ли́ка преподо́бных твои́х. Все у́бо упова́ние к Тебе́ возлага́ю: Ты бо и оби́тель на́шу сохраня́еши моли́твами преподо́бнаго.
Песнь 7.
Ирмос: Тя живопису́ющий ассири́йский пламень,/ ю́ноши три спасе́, Го́споди,/ я́коже и Де́ву не опали́ Отрокови́цу/ в Боже́ственном Рождестве́ Твое́м, Боже́ственная И́скра:// Препе́тый отце́в Бо́же благослове́н еси́.
Преподо́бне о́тче наш Дави́де, моли́ Бо́га о нас.
Да́ры светода́тельными озаре́н, преподо́бне, де́монский мрак всеце́ло отгна́л еси́ и свет возсия́л еси́ в се́ни сме́ртней седя́щим, те́мже тя, Дави́де, почита́ем.
Преподо́бне о́тче наш Дави́де, моли́ Бо́га о нас.
Анто́ния и Феодо́сия, общежи́тия нача́льников, христоподража́тельному житию́ поревнова́л еси́ и, благослове́нием преподо́бнаго Пафну́тия укрепле́н, оби́тель созда́л еси́, в не́йже и́мя Госпо́дне непреста́нно сла́вится, Дави́де преподо́бне.
Преподо́бне о́тче наш Дави́де, моли́ Бо́га о нас.
В поще́ниих непрекло́нное, во искуше́ниих неосла́бное, в терпе́ниих неотсту́пное име́л еси́ стяжа́ние, тем нетле́нными венцы́ от Бо́га венча́н еси́.
Преподо́бне о́тче наш Дави́де, моли́ Бо́га о нас.
Истиннаго Бо́га песносло́вил еси́, Отца́ и Сы́на и Ду́ха Всесвята́го, Тро́ицу Неразде́льную, от нея́же де́йство прия́л еси́, е́же исцеля́ти неду́ги разли́чныя, прогоня́ти ду́хи лука́выя, те́мже па́мять твою́ почита́ем, досточу́дне.
Преподо́бне о́тче наш Дави́де, моли́ Бо́га о нас.
Днесь мо́лим тя: непреста́нно моли́, Дави́де о́тче наш, о ста́де свое́м, его́же трудолю́бно собра́л еси́, и спаси́ и́же тя на моли́тву призыва́ющих и плоды́ принося́щих любо́вию.
Слава: У́треневав ко Христу́, от Него́ светлостьми́ озари́вся бога́тно, и све́та напо́лнился еси́ Боже́ственнейша, и просвеща́еши ве́рно чту́щия тя всегда́.
И ныне: Неи́стовство жен испра́вила еси́, Де́во Преблагослове́нная, Сло́ва ро́ждши, гор воздви́жущаго низпа́дшия, я́ко Бла́га и Держа́внаго сил, Его́же Дави́д преподо́бный вожделе́вши усе́рдно: в след Тебе́ потеку́, – ра́дующеся возопи́л есть.
Песнь 8.
Ирмос: Песнь но́вую пои́м лю́дие,/ Соше́дшему на зе́млю спасти́ ны:/ во́лею бо на Кресте́ пригвозди́ся Госпо́дь,/ показа́вый язы́ком,/ я́ко Ада́ма ра́ди/ в ра́бий зрак облече́ся,// в вы́шних живы́й во ве́ки.
Преподо́бне о́тче наш Дави́де, моли́ Бо́га о нас.
Его́же возлюби́л еси́ Христа́, ны́не ви́диши не се́нию ни привиде́нием, но незазо́рным зерца́лом, я́сно, Лице́м к лицу́ и па́че естества́ и́стинным явле́нием, преблаже́нне.
Преподо́бне о́тче наш Дави́де, моли́ Бо́га о нас.
Ду́хом Святы́м укрепи́вся, духо́в зло́бы победи́л еси́ жезло́м ве́ры, жезло́м бо игу́менства твоего́ изцеля́ше неду́жныя, де́монское каменомета́ние му́жески отража́я, храня́ше бо тя И́же жезло́м мо́ре лю́дем раздели́вый.
Преподо́бне о́тче наш Дави́де, моли́ Бо́га о нас.
Обре́те оби́тель Вознесе́нская тя пра́вило и изве́стнейший о́браз, всяк проше́дша доброде́тельных дея́ний вид, преподо́бных похвало́, му́дре Дави́де. Те́мже пожи́вше Боже́ственне, с тобо́ю лику́ют во ве́ки.
Преподо́бне о́тче наш Дави́де, моли́ Бо́га о нас.
Стяжа́л еси́, преподо́бне Дави́де, воздержа́ние ди́вное и моли́тву непреста́нную, вознося́щее смире́ние и любо́вь и́стинную и безстра́стие, о́тче. Сего́ ра́ди Христо́с благода́ть тебе́ подаде́ чуде́с во ве́ки.
Преподо́бне о́тче наш Дави́де, моли́ Бо́га о нас.
Твоя́ по́двиги воспе́ша Ангельския си́лы, Дави́де, и житие́ твое́ лик преподо́бных похвали́, све́тлое и укра́шенное мона́хов ра́дование. Тем и ны́не, сра́дуяся ему́, весели́шися, Христа́ поя́ во ве́ки.
Сла́ва: Обы́чно соверши́в де́ло свое́ на земли́ мно́гими ле́ты, я́ко клас зре́лый, пожа́ тя рука́ А́нгела Бо́жия, и прия́ тя, я́ко стори́чный плод, в жи́тницу ве́чнаго воздая́ния Христо́с, препе́тый и превозноси́мый во ве́ки.
И ны́не: Иису́са моего́ Ма́ти Богоблагода́тная, в мо́ри страсте́й обурева́емых спаси́ ны, да све́тло воспое́м си́лы Твоя́ и Сы́нови Твоему́ благода́рственная воздади́м, Пречи́стая.
Песнь 9.
Ирмос: Пое́м Тя Пресвята́я Ма́ти Де́во сла́вная,/ я́ко прозябла́ еси́ небе́сный Клас – Христа́ Бо́га,/ па́че вся́кия мы́сли,/ от Тебе́ Хлеб бысть Живоно́сный ве́рным./ Тем Ти зове́м:/ ра́дуйся, Непоро́чная,// пребы́вшая Де́ва по Рождестве́ Чи́стая.
Преподо́бне о́тче наш Дави́де, моли́ Бо́га о нас.
Ни́жняя оста́вль, отше́л еси́ к Вы́шним, те́ло же твое́ пренесе́но бысть в це́рковь собо́рную, иде́же пе́ньми и пе́сньми духо́вными почто́ша тя, о́тче преподо́бне, вопию́ще: се бо де́ти твои́, любо́вию к тебе́ горя́ще, при́сно тя помина́ем и велича́ем.
Преподо́бне о́тче наш Дави́де, моли́ Бо́га о нас.
И́же оте́чествия твоего́ лю́дие, к ра́це моще́й твои́х святы́х прихо́дим и от се́рдца зове́м: поми́луй своя́ ча́да и от печа́ли избавля́й, ви́диши бо вся печа́льны и уны́лы, но моли́ Всеми́лостиваго Бо́га изба́вити нас вско́ре моли́твами твои́ми.
Преподо́бне о́тче наш Дави́де, моли́ Бо́га о нас.
Изцеле́ния соде́лывают честны́я мо́щи твоя́, Дави́де преподо́бне, и отго́нят разли́чныя неду́ги от челове́к, и укрепля́ют ум их восхвали́ти труды́ твоя́, всече́стне.
Преподо́бне о́тче наш Дави́де, моли́ Бо́га о нас.
Го́ры и хо́лми да взыгра́ют, и все мно́жество мона́шествующих да воспле́щет днесь, я́ко наста́ нам светоно́сный твой пра́здник, преподо́бне Дави́де, испо́лнь ра́дости и весе́лия духо́внаго. И ны́не, иму́ще тя поще́ния пра́вило и законополо́жника, ра́дуемся.
Преподо́бне о́тче наш Дави́де, моли́ Бо́га о нас.
Ено́ха Бог просла́ви, и сей преста́вися во сла́ве еди́ножды; ты же преподо́бне, ки́йждый день преставля́лся еси́, сме́ртный час во уме́ помышля́я, и сло́вом Бо́жиим спаса́лся еси́. Та́кожде и нас помышля́ти вразумля́й, да сла́вим тя по до́лгу че́стно.
Сла́ва: Распросте́р преподо́бнии твои́ ру́це, принеси́ моле́ние ко Всеми́лостивому Спа́су, о́тче Богому́дре Дави́де, сохрани́ти оби́тель твою́ невреди́му от ва́рварскаго наше́ствия и междоусо́бныя бра́ни и спасти́ нас, тебе́ велича́ющих.
И ны́не: Ма́тернее дерзнове́ние, е́же к Сы́ну Твоему́, иму́ще, Пречи́стая, сро́днаго промышле́ния, е́же о нас, не пре́зри, мо́лимся, я́ко Тебе́ и Еди́ну, христиа́не, ко Влады́це очище́ние ми́лостивно предлагаем.
Та же: Досто́йно есть я́ко во и́стинну/ Блажи́ти Тя Богоро́дицу,/ Присноблаже́нную и Пренепоро́чную/ и Ма́терь Бо́га На́шего./ Честне́йшую херуви́м/ и Сла́внейшую без сравне́ния серафи́м,/ без истле́ния Бо́га Сло́ва Ро́ждшую,// Су́щую Богоро́дицу Тя велича́ем.
Па́ки и па́ки ми́ром Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Возглашение: Ты бо Еси́ Царь ми́ра, и Спас душ на́ших и Тебе́ сла́ву возсыла́ем Отцу́ и Сы́ну и Свято́му Ду́ху ны́не и при́сно и во ве́ки веко́в.
Лик: Аминь.
Светилен: А́нгел был еси́ во пло́ти земны́й и Небе́сный челове́к, доброде́тельным житие́м на земли́ просия́л еси́, по преставле́нии же чудесы́, от моще́й твои́х быва́ющими, ве́рныя удиви́л еси́; мы же непреста́нно мо́лим тя, о́тче наш Дави́де, непресту́пно пребыва́ти от ме́ста сего́ и ста́до, тобо́ю со́бранное, покрыва́ти моли́твами твои́ми.
Сла́ва, и ны́не:
Богородичен: На Богома́терь упова́ние возложи́в, преподо́бне, Зна́мения Ея́ честна́го ико́ною ме́сто сие́ освяти́в, в зало́г спасе́ния о́браз сей оста́вил еси́; мы же пред ним моля́щеся, про́сим усе́рдно: поми́луй нас, Пречи́стая, преподо́бнаго Дави́да о нас усе́рдными мольба́ми.
Таже глаголет диакон, или иерей, ектению:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши, и поми́луй.
Лик: Го́споди, поми́луй. (Трижды)
Еще́ мо́лимся о Вели́ком Господи́не и отце́ на́шем Святе́йшем Патриа́рхе Кири́лле, и о Господи́не на́шем Высокопреосвяще́ннейшем Ювена́лии, и всей во Христе́ бра́тии на́шей.
Лик: Го́споди, поми́луй. (Трижды)
Еще́ мо́лимся о Богохрани́мей стране́ на́шей, власте́х и во́инстве ея́ да ти́хое и безмо́лвное житие́ поживе́м во вся́ком благоче́стии и чистоте́.
Лик: Го́споди, поми́луй. (Трижды)
Еще́ мо́лимся о блаже́нных и приснопа́мятных созда́телех святы́я оби́тели сея́, и о всех пре́жде почи́вших отце́х и бра́тиях, зде лежа́щих, и повсю́ду правосла́вных.
Лик: Го́споди, поми́луй. (Трижды)
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, бра́тии святы́я оби́тели сея́.
Лик: Го́споди, поми́луй. (Трижды)
Еще́ мо́лимся о плодонося́щих, и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Лик: Го́споди, поми́луй. (Трижды)
Возглашает иерей: Я́ко Ми́лостив и Человеколю́бец Бог Еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Ко преподо́бному и Богоно́сному отцу́ на́шему Дави́ду Серпуховско́му помо́лимся.
Лик: Преподо́бне о́тче наш Дави́де, моли́ Бо́га о нас.
О, до́брый наш па́стырю и богому́дрый наста́вниче, Преподо́бне о́тче наш Дави́де! Услы́ши ны́не к тебе́ приноси́мое моле́ние на́ше: ве́мы бо, я́ко ду́хом с на́ми пребыва́еши. Ты у́бо, Преподо́бне, я́ко име́яй дерзнове́ние ко Всеми́лостивому Влады́це Иису́су Христу́, Бо́гу на́шему, и ко Пречи́стей Богома́тери, бу́ди хода́тай и моли́твенник те́плый о оби́тели сей, ю́же возгради́л еси́, и о нас недосто́йных рабе́х, живу́щих в ней, ея́же ты просвети́тель еси́ и нача́льник, богосо́бранному же твоему́ бра́тству помо́щник и засту́пник при́сно явля́ешися: я́ко да твои́м предста́тельством и моли́твами невреди́ми на ме́сте сем пребу́дем, от бесо́в же и злых челове́к ненаве́товани и от всех бед и напа́стей свобо́дни сохрани́мся. Всем же отвсю́ду приходя́щим во святу́ю оби́тель твою́ и моля́щимся тебе́ с ве́рою и поклоня́ющимся ра́це моще́й твои́х, ко е́же изба́витися от вся́кия ско́рби, боле́зни и напа́сти, ми́лостивне поспеши́, дарова́ти же правосла́вным мир, тишину́, благоде́нствие и изоби́лие плодо́в земны́х; и о всех нас те́плый предста́тель ко Го́споду и помо́щник душа́м на́шим бу́ди, е́же отпусти́тися нам согреше́нием на́шим и моли́твами твои́ми, свя́те, изба́витися нам от ве́чнаго муче́ния и сподо́битися Небе́снаго Ца́рствия со все́ми святы́ми, да сла́ву, благодаре́ние и поклоне́ние возсыла́ем Еди́ному Бо́гу, в Тро́ице сла́вимому, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Ами́нь.
Священник: Пресвята́я Богоро́дице, спаси́ нас.
Лик: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Священник: Сла́ва Тебе́ Христе́ Бо́же, Упова́ние на́ше, сла́ва Тебе́.
Лик: Сла́ва, и ны́не: Го́споди, поми́луй. (Трижды) Благослови́.
Священник творит отпуст:
Хритсо́с И́стинный Бог наш моли́твами Пречи́стыя Своея́ Ма́тере, преподо́бнаго и богоно́снаго отца́ на́шего Дави́да, игу́мена Вознесе́нскаго чудотво́рца и всех святы́х поми́лует нас, я́ко Благ и Человеколю́бец.
Ублажа́ем тя,/ преподо́бне о́тче наш Дави́де,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Оставить отзыв